योत्स्यमानानवेक्षेऽहं...

श्लोकः

गीतोपदेशः

योत्स्यमानानवेक्षेऽहं य एतेऽत्र समागताः ।

धार्तराष्ट्रस्य दुर्बुद्धेर्युद्धे प्रियचिकीर्षवः ॥ २३ ॥

अयं भगवद्गीतायाः प्रथमोध्यायस्य अर्जुनविषादयोगस्य त्रयोविंशतितमः (२३) श्लोकः ।

योत्स्यमानान्, अवेक्षे, अहम्, ये, एते, अत्र, समागताः । धार्तराष्ट्रस्य, दुर्बुद्धेः, युद्धे, प्रियचिकीर्षवः ॥

दुर्बुद्धेः धार्तराष्ट्रस्य युद्धे प्रियचिकीर्षवः ये एते अत्र समागताः (तान्) अहं योत्स्यमानान् अवेक्षे ।

दुर्बुद्धेः = दुष्टमतेः

धार्तराष्ट्रस्य = दुर्योधनस्य

युद्धे = रणे

प्रियचिकीर्षवः = प्रियं कर्तुम् इच्छवः

ये एते = ये इमे

अत्र = अस्मिन् स्थाने

समागताः = आयाताः

अहम् = अहम्

योत्स्यमानान् = युद्धं करिष्यमाणान्

अवेक्षे = पश्यामि ।

युद्धं कर्तुं अत्र ये आगताः सन्ति ते सर्वे युद्धे दुर्बुद्धेः दुर्योधनस्य प्रियं कर्तुमेव उपस्थिताः सन्ति । तान् योद्धुम् इच्छतः योधान् अहं पश्यामि ।