तस्य सञ्जनयन् हर्षं...

श्लोकः

गीतोपदेशः

तस्य सञ्जनयन् हर्षं कुरुवृद्धः पितामहः ।

सिंहनादं विनद्योच्चैः शङ्खं दध्मौ प्रतापवान् ॥ १२ ॥

अयं भगवद्गीतायाः प्रथमोध्यायस्य अर्जुनविषादयोगस्य द्वादशः (१२) श्लोकः ।

तस्य, सञ्जनयन्, हर्षम्, कुरुवृद्धः, पितामहः । सिंहनादम्, विनद्य, उच्चैः, शङ्खम्, दध्मौ, प्रतापवान् ॥

प्रतापवान् कुरुवृद्धः पितामहः तस्य हर्षं सञ्जनयन् सिंहनादं विनद्य उच्चैः शङ्खं दध्मौ ।

प्रतापवान् = तेजस्वी

कुरुवृद्धः = कुरुषु ज्येष्ठः

पितामहः = भीष्मः

हर्षम् = मोदम्

सञ्जनयन् = उत्पादयन्

सिंहनादं विनद्य = सिंहः इव गर्जित्वा

शङ्खम् = शङ्खम्

उच्चैः = गाढम्

दध्मौ = आध्मातवान् ।

तदा पितामहः भीष्मः सिंहः इव उच्चैः गर्जनम् अकरोत् । ततः शङ्खमपि उच्चैः अधमत् येन दुर्योधनस्य महान् सन्तोषः जातः ।