अन्ये च बहवः शूरा...

श्लोकः

गीतोपदेशः

अन्ये च बहवः शूरा मदर्थे त्यक्तजीविताः ।

नानाशस्त्रप्रहरणाः सर्वे युद्धविशारदाः ॥ ९ ॥

अयं भगवद्गीतायाः प्रथमोध्यायस्य अर्जुनविषादयोगस्य नवमः (९) श्लोकः ।

अन्ये, च, बहवः, शूराः, मदर्थे, त्यक्तजीविताः । नानाशस्त्रप्रहरणाः, सर्वे, युद्धविशारदाः ॥९॥

नानाशस्त्रप्रहरणाः शूराः सर्वे युद्धविशारदाः अन्ये च बहवः मदर्थे त्यक्तजीविताः (सन्ति) ।

अन्ये = इतरे,

बहवः = नैके,

शूराः = विक्रमिणः,

मदर्थे = मम कृते,

त्यक्तजीविताः = अर्पितप्राणाः,

नानाशस्त्रप्रहरणाः = बहुशस्त्राः,

सर्वे = सकलाः,

युद्धविशारदाः = समरनिपुणाः ।

न केवलम् एतावन्तः, अन्येऽपि बहवः मदर्थं प्राणान् समर्पयितुं सिद्धाः बहुविधानि प्रहारसाधनानि शस्त्राणि धृतवन्तः समरनिष्णाताः विक्रमिणः सैन्ये सन्ति ।