सङ्करो नरकायैव...

श्लोकः

गीतोपदेशः

सङ्करो नरकायैव कुलघ्नानां कुलस्य च ।

पतन्ति पितरो ह्येषां लुप्तपिण्डोदकक्रियाः ॥ ४२ ॥

अयं भगवद्गीतायाः प्रथमोध्यायस्य अर्जुनविषादयोगस्य द्विचत्वारिंशत्तमः (४२) श्लोकः ।

सङ्करः, नरकाय, एव, कुलघ्नानाम्, कुलस्य, च । पतन्ति, पितरः, हि, एषाम्, लुप्तपिण्डोदकक्रियाः ॥

सङ्करः कुलघ्नानाम् कुलस्य च नरकाय एव भवति । एषां पितरः लुप्तपिण्डोदकक्रियाः पतन्ति हि ॥

कुलघ्नानाम् = वंशनाशकानाम्

सङ्करः = मिश्रणम्

कुलस्य = वंशस्य

नरकाय एव = नरकलोकाय एव

लुप्तपिण्डोदकक्रियाः = नष्टपिण्डजलतर्पणाः

एषाम् = एतेषाम्

पितरः = पितृदेवताः

पतन्ति = ग्लायन्ति ।

वर्णसङ्करः नरकस्य कारणं भवति । तेन कुलघातकाः कुलानि च नरकं गच्छन्ति । तेषां पितरः  पिण्डोदकवञ्चिताः भवन्ति । ततश्च ते नरके पतन्ति