गामाविश्य च भूतानि...
नेविगेशन पर जाएँ
खोज पर जाएँ
श्लोकः
- गामाविश्य च भूतानि धारयाम्यहमोजसा ।
- पुष्णामि चौषधीः सर्वाः सोमो भूत्वा रसात्मकः ॥ १३ ॥
अयं भगवद्गीतायाः पञ्चदशोऽध्यायस्य पुरुषोत्तमयोगस्य त्रयोदशः(१३) श्लोकः ।
पदच्छेदः
गाम् आविश्य च भूतानि धारयामि अहम् ओजसा पुष्णामि च औषधीः सर्वाः सोमः भूत्वा रसात्मकः ॥ १३ ॥
अन्वयः
अहं गाम् आविश्य च ओजसा भूतानि धारयामि, रसात्मकः सोमः भूत्वा सर्वाः औषधीः च पुष्णामि।
शब्दार्थः
- गाम् = भूमिम्
- आविश्य = प्रविश्य
- ओजसा = बलेन
- भूतानि = चराचराणि
- धारयामि =वहामि
- रसात्मकः = रसस्वभावः
- सोमः = चन्द्रः
- औषधीः = फलपाकान्तानि सस्यानि
- पुष्णामि = पोषयामि ।
अर्थः
अहं धूलिराशितुल्याम् इमां पृथिवीं सर्वदा दृढीकुर्वन् स्वबलेन भूतानि धारयामि । अन्यथा सिकताराशिवत् इयं पृथिवी विच्छिद्येत । एवम् अहमेव रसरूपः चन्द्रः सन् पृथिव्याम् अस्यां जायमानानि सर्वाण्यपि व्रीहिमाषमुद्गादीनि संवर्धयामि ।